جان نشاط حسن کی دنیا کہیں جسے جنت ہے ایک خون تمنا کہیں جسے اس جلوہ گاہ حسن میں چھایا ہے ہر طرف ایسا حجاب چشم تماشا کہیں جسے یہ اصل زندگی ہے یہ جان حیات ہے حسن مذاق شورش سودا کہیں جسے میرے وداع ہوش کو اتنا بھی ہے بہت یہ آب و رنگ حسن کا پردا کہیں جسے اکثر رہا ہے حسن حقیقت بھی سامنے اک مستقل سراب تمنا کہیں جسے اب تک تمام فکر و نظر پر محیط ہے شکل صفات معنی اشیا کہیں جسے ہر موج کی وہ شان ہے جام شراب میں برق فضائے وادئ سینا کہیں جسے زندانیوں کو آ کے نہ چھیڑا کرے بہت جان بہار نکہت رسوا کہیں جسے اس ہول دل سے گرم رو عرصہ وجود میرا ہی کچھ غبار ہے دنیا کہیں جسے سرمستیوں میں شیشہ مے لے کے ہاتھ میں اتنا اچھال دیں کہ ثریا کہیں جسے شاید مرے سوا کوئی اس کو سمجھ سکے وہ ربط خاص رنجش بے جا کہیں جسے میری نگاہ شوق پہ اب تک ہے منعکس حسن خیال شاہد زیبا کہیں جسے دل جلوہ گاہ حسن بنا فیض عشق سے وہ داغ ہے کہ شاہد رعنا کہیں جسے اصغرؔ نہ کھولنا کسی حکمت مآب پر راز حیات ساغر و مینا کہیں جسے
اصغر گونڈوی
