اب وہ کہتے ہیں تم کوئی چارہ کرو جب کوئی عہد و پیماں سلامت نہیں اب کسی کنج میں بے اماں شہر کی کوئی دل کوئی داماں سلامت نہیں تم نے دیکھا ہے سر سبز پیڑوں پہ اب سارے برگ و ثمر خار و خس ہو گئے اب کہاں خوبصورت پرندوں کی رت جو نشیمن تھے اب وہ قفس ہو گئے صحن گلزار خاشاک کا ڈھیر اب درختوں کے تن پر قبائیں کہاں سرو و شمشاد سے قمریاں اڑ گئیں شاخ زیتون پر فاختائیں کہاں شیخ منبر پہ نا معتبر ہو چکا رند بدنام کوئے خرابات میں فاصلہ ہو تو ہو فرق کچھ بھی نہیں فتوہ دیں میں ہو اور کفر کی بات میں اب تو سب رازداں ہمنوا نامہ بر کوئے جاناں کے سب آشنا جا چکے کوئی زندہ گواہی بچی ہی نہیں سب گنہگار سب پارسا جا چکے اب کوئی کس طرح قم بہ اذنی کہے اب کہ جب شہر کا شہر سنسان ہے حرف عیسیٰ نہ صور اسرافیل ہے حشر کا دن قیامت کا میدان ہے مرگ انبوہ بھی جشن ساماں نہیں اب کوئی قتل گاہوں میں جائے تو کیا کب سے توقیر لالہ قبائی گئی .کوئی اپنے لہو میں نہائے تو کیا
احمد فراز
![اب وہ کہتے ہیں تم کوئی چارہ کرو 1 IMG 20240311 005124](https://iztirab.com/wp-content/uploads/2024/03/IMG_20240311_005124.jpg)