اس بزم میں نہ ہوش رہے گا ذرا مُجھے اے شوق ہرزہ تاز کہاں لے چلا مُجھے یہ درد دل ہی زیست کا باعث ہے چارہ گر مر جاؤں گا جو آئی موافق دوا مُجھے اِس ذوق ابتلا کا مزہ اِس کہ دم سے ہے سب کچھ ملا ملا ہو دِل مبتلا مُجھے دیر و حرم کو دیکھ لیا خاک بھی نہیں بس اے تلاش یار نہ در در پھرا مُجھے یہ دل سے دور ہو نہ دکھائے خُدا وہ دن ظالم تیرا خیال ہے دل سے سوا مُجھے رنج و ملال و حسرت و ارمان و آرزو جانے سے ایک دل کہ بہت کچھ ملا مُجھے میں جانتا ہوں آپ ہیں مست اپنے حال میں .بیخودؔ نہیں ہے آپ سے مطلق گلا مُجھے
بیخود بد ایونی
![اس بزم میں نہ ہوش رہے گا ذرا مُجھے 1 IMG 20240311 005124](https://iztirab.com/wp-content/uploads/2024/03/IMG_20240311_005124.jpg)