اس کی آواز میں تھے سارے خد و خال اس کے وہ چہکتا تھا تو ہنستے تھے پر و بال اس کے کہکشاؤں میں تڑپتے تھے ستاروں کے پرند سبز آکاش پہ ہر سو تھے بچھے جال اس کے زرد رو ایک ہی پل میں ہوئی مدھ ماتی شام لال ہونے بھی نہ پائے تھے ابھی گال اس کے کاٹ ہی لیں گے جدائی کا زمانہ ہم تو دیکھیے کیسے گزرتے ہیں مہ و سال اس کے ایک دن ہم بھی کھلے اس کی حسیں راہوں میں ایک دن پاؤں میں ہم بھی ہوئے پامال اس کے چاندنی اس کا بدن چاند ہے اس کا چہرہ کھیتیاں دھان کی آنکھوں کے حسیں تال اس کے رت جگا ہم بھی منائیں کہ سنا ہے ہم نے روز لکھتی ہے سحر خون سے احوال اس کے
وزیر آغا
