پرانا گیا اور نیا سال آیا مبارک ہو تم کو نیا سال بچو جو اب ہاتھ میں ہے کرو فکر اس کی گیا ہاتھ سے جو گیا سال بچو دکھائے خدا سال تم کو بہت سے یوں ہی سال پر سال آتا رہے گا وہ جاتا رہے گا پرانا جو ہوگا نیا سال ہر سال آتا رہے گا پرانا اگر سال غفلت میں گزرا گزارو نیا سال ہشیار ہو کر جو پچھلے برس میں کمی رہ گئی ہے کرو اس کو پورا خبردار ہو کر نیا سال ہو جائے گا جب پرانا تو ساماں کرے گا وہ اپنے سفر کے کئے ہوں گے تم نے اگر کام اچھے وہ خوش جائے گا تم کو دل شاد کر کے کیا ہوگا ضائع اگر تم نے اس کو تو غصے کی صورت دکھائے گا تم کو وہ خود جانے والا تو جا ہی چکے گا مگر جاتے جاتے رلائے گا تم کو مبارک ہو تم کو نیا سال بچو امنگیں نئی دل میں پیدا کرو تم خوشی لکھنے پڑھنے میں ہو تم کو حاصل جو ہو کام اچھے سے اچھے کرو تم
تلوک چند محروم
