بہار باغ جنت ہے بہار روضۂ صابر جوار عرش اعلیٰ ہے جوار روضۂ صابر یہاں بے پردہ اللہ و نبی کی دید ہوتی ہے ہمیں مکہ مدینے ہے دیار روضۂ صابر زمیں کلیئر کی روضہ کی فضا پر ناز کرتی ہے فلک ہوتا ہے پھر پھر کر نثار روضۂ صابر یہاں پر مردہ دل آکر حیات تازہ پاتا ہے بہار جاوداں ہے ہمکنار روضۂ صابر رہے رنگیں چمن خون شہیدان محبت سے سدا پھولے پھلے یہ لالہ زار روضۂ صابر بناؤں غازہ رخسار ایماں خاک کلیئر کی مری آنکھوں کا سرمہ ہو غبار روضۂ صابر تصور سے نظر میں کوندتی ہیں بجلیاں بیدمؔ عجب پر نور ہیں نقش و نگار روضۂ صابر
بیدم شاہ وارثی
