جادۂ مرگ مسلسل سے گزرتا جاؤں
زندگی یہ ہے کہ ہر سانس میں مرتا جاؤں
خون ہر لمحۂ موجود کا کرتا جاؤں
رنگ تصویر شب و روز میں بھرتا جاؤں
منتشر سلسلۂ غم کو تو کرتا جاؤں
ساتھ ہی ساتھ مگر خود بھی بکھرتا جاؤں
بس یوں ہی ہمسریٔ اہل جہاں ممکن ہے
دم بہ دم اپنی بلندی سے اترتا جاؤں
میں کسی منزل ہستی پہ کہاں رکتا تھا
راہ میں تم جو نہ مل جاؤ گزرتا جاؤں
عمر بھر جادۂ پر خار پہ چلنا ہوگا
دو گھڑی سایۂ گل میں بھی ٹھہرتا جاؤں
اپنی قسمت ہوں الجھتا ہی چلا جاتا ہوں
تیری تقدیر نہیں ہوں کہ سنورتا جاؤں
آ ہی نکلا ہوں جو یادوں کے کھنڈر تک مخمورؔ
بھولے بسروں سے ملاقات بھی کرتا جاؤں
مد و جزر یم احساس کا پروردہ ہوں
ڈوبتا جاؤں مگر خود ہی ابھرتا جاؤں
مخمور سعیدی