حاجیوں آؤ شہنشاہ کا روضہ دیکھو کعبہ تو دیکھ چکے کعبے کا کعبہ دیکھو رکن شامی سے مٹی وحشت شام غربت اب مدینہ کو چلو صبح دل آرا دیکھو آب زمزم تو پیا خوب بجھائیں پیاسیں آؤ خود شہ کوثر کا بھی دریا دیکھو زیر میزاب ملے خوب کرم کے چھینٹے ابر رحمت کا یہاں زور برسنا دیکھو دھوم دیکھی ہے در کعبہ پہ بیتابوں کی ان کے مشتاقوں میں حسرت کا تڑپنا دیکھو مثل پروانہ پھرا کرتے تھے جس شمع کے گرد اپنی شمع کو پروانہ یہاں کا دیکھو خوب آنکھوں سے لگایا ہے غلاف کعبہ قصر محبوب کے پردے کا بھی جلوہ دیکھو دل مطیعوں کا جگر خوف سے پانی پایا یاں سیہ کاروں کا دامن پہ مچلنا دیکھو اولیں خانۂ حق کی تو ضیائیں دیکھیں آخریں بیت نبی کا بھی تجلا دیکھو زینت کعبہ میں تھا لاکھ عروسوں کا بناو جلوہ فرما یہاں کونین کا دولہا دیکھو ایمن طور کا تھا رکن یمانی میں فروغ شعلۂ طور یہاں انجمن آرا دیکھو مہد مادر کامزہ دیتی ہیں آغوش حطیم جس پہ ماں باپ فدا یاں کرم ان کا دیکھو دھو چکا ظلمت دل بوسۂ سنگ اسود خاک بوسیٔ مدینہ کا بھی رتبہ دیکھو کرچکی رفعت کعبہ پہ نظر پروازیں ٹوپی اب تھام کے خاک در والا دیکھو بے نیازی سے وہاں کانپتی پائی حاجت جوش رحمت پہ یہاں ناز گنا کا دیکھو جمعۂ مکہ تھا عید اہل عبادت کے لئے مجرموں آؤ یہاں عید دوشنبہ دیکھو ملتزم سے گلے لگ کے تو نکالے ارماں ادب وشوق کا یاں باہم الجھنا دیکھو خوب مسعیٰ میں با امید صفا دوڑ لیے رہ جاناں کی صفا کا بھی تماشہ دیکھو رقص بسمل کی بہاریں تو منیٰ میں دیکھیں دل خوننابہ فشاں کا بھی تڑپنا دیکھو غور سے سن تو رضا کعبہ سے آتی ہے صدا میری آنکھوں سے مرے پیار کا روضہ دیکھو
احمد رضا خاں بریلوی
![حاجیوں آؤ شہنشاہ کا روضہ دیکھو 1 IMG 20240311 005241](https://iztirab.com/wp-content/uploads/2024/03/IMG_20240311_005241.jpg)