حساب عمر کرو یا حساب جام کرو بقدر ظرف شب غم کا اہتمام کرو اگر ذرا بھی روایت کی پاسداری ہے خرد کے دور میں رسم جنوں کو عام کرو خدا گواہ فقیروں کا تجربہ یہ ہے جہاں ہو صبح تمہاری وہاں نہ شام کرو نہ رند و شیخ نہ ملا نہ محتسب نہ فقیہ یہ مے کدہ ہے یہاں سب کو شاد کام کرو وہی ہے تیشہ بیاباں وہی ہے دار وحی جو ہو سکے تو زمانے میں تم بھی نام کرو اسیر زلف ہمیں اک نہیں ہیں میرؔ بھی تھے مگر اب اٹھ کے دو عالم کو زیر دام کرو خرام یار کی آہٹ سی دل سے آتی ہے سرشک خوں سے چراغاں کا اہتمام کرو اریبؔ دیکھو نہ اتراؤ چند شعروں پر غزل وہ فن ہے کہ غالبؔ کو تم سلام کرو
سلیمان اریب
