فضا جاں فزا ذرہ ذرہ حسیں ہے حقیقت میں ملک دکن گل زمیں ہے اگر مہر و الفت کی جنت کہیں ہے تو بے شک یہیں ہے یہیں ہے یہیں ہے زمانہ دل آزار ہے بھی تو کیا غم مجھے تیری دل داریوں کا یقیں ہے نفاست برستی ہے دیوار و در سے تری خاک میں نکہت یاسمیں ہے تری یاد یاد وطن سے ہے خوشتر ترا ذکر تسکین قلب حزیں ہے بہشت نظر مرغزار غزالاں ہوا تیری موج مے و انگبیں ہے بہت خوش نما شہر دیکھے ہیں میں نے مگر تیرا جادو کہیں بھی نہیں ہے
سکندر علی وجد
