دل ہی نہیں کہ منت درباں اٹھائیے کس کو وفا کا سلسلہ جنباں اٹھائیے تا چند داغ بیٹھیے نقصاں اٹھائیے اب چار سوے عشق سے دوکاں اٹھائیے صد جلوہ روبرو ہے جو مژگاں اٹھائیے طاقت کہاں کہ دید کا احساں اٹھائیے ہے سنگ پر برات معاش جنون عشق یعنی ہنوز منت طفلاں اٹھائیے ہستی فریب نامۂ موج سراب ہے یک عمر ناز شوخی عنواں اٹھائیے ضبط جنوں سے ہر سر مو ہے ترانہ خیز یک نالہ بیٹھیے تو نیستاں اٹھائیے نذر خراش نالہ سر شک نمک اثر لطف کرم بدولت مہماں اٹھائیے دیوار بار منت مزدور سے ہے خم اے خانماں خراب نہ احساں اٹھائیے یا میرے زخم رشک کو رسوا نہ کیجیے یا پردۂ تبسم پنہاں اٹھائیے انگور سعی بے سروپائی سے سبز ہے غالبؔ بدوش دل خم مستاں اٹھائیے
مرزا غالب
![دل ہی نہیں کہ منت درباں اٹھائیے 1 IMG 20240311 005241](https://iztirab.com/wp-content/uploads/2024/03/IMG_20240311_005241.jpg)