راز ہستی تشنہ تعبیر ہے تیرے بغیر زندگی تقصیر ہی تقصیر ہے تیرے بغیر زیست کی ہر کامیابی بھی مری نظروں میں خاک ایک بے بنیاد سی تعمیر ہے تیرے بغیر جس کو ہونا چاہیے تھا تازہ دم کلیوں کا ہار وہ نفس کا سلسلہ زنجیر ہے تیرے بغیر ہاں وہی لب جو تبسم کا خزانہ تھا کبھی آج رہن نالہ شب گیر ہے تیرے بغیر دل کی حالت ہے کہ جیسے اک طلسم بے کلید ہر تمنا حرف بے تعبیر ہے تیرے بغیر ہو نہیں پاتی کوئی آسان سی مشکل بھی سہل کند سا ہر ناخن تدبیر ہے تیرے بغیر چاند برساتا ہے جب راتوں کو امرت کی پھوار ہاں اسی کی ہر لڑی اک تیر ہے تیرے بغیر روشنی اس کے کسی رخ پر بھی آ پاتی نہیں زندگی دھندلی سی اک تصویر ہے تیرے بغیر آ اگر بیگانہ احساس تیرا دل نہیں تیرا ملاؔ خستہ و دلگیر ہے تیرے بغیر
آنند نرائن ملا
