سو قصوں سے بہتر ہے کہانی میرے دِل کی سن اِس کو تُو اے جان زبانی میرے دِل کی ہر نالے میں یاں ٹکڑے جگر ہوتا ہے بلبل آسان نہیں طرز اڑانی میرے دِل کی ہونی ہے شہید ایک نہ اِک روز تمنا موقوف ہو کیا مرثیہ خوانی میرے دِل کی پیری میں بھی ملتا ہے جُو کمسن کوئی محبوب کرتی ہے وہیں عود جوانی میرے دِل کی تقسیم کیے پارۂ دِل بزم بتاں میں ہر ایک کہ ہے پاس نشانی میرے دِل کی اِک بات میں ہو جائے مسخر وُہ پری رو سنتا ہی نہیں سحر بیانی میرے دِل کی ہے ابر تُو کیا چاہے فلک کو بھی جلا دے بجلی میں کہاں شعلہ فشانی میرے دِل کی زلفوں میں کیا قید نہ ابرو سے کیا قتِل تُو نے تُو کوئی بات نہ مانی میرے دل کی یہ بار غم عشق سمایا ہے کے ناسخؔ .ہے کوہ سے دہ چند گرانی میرے دل کی
امام بخش ناسخ
