مہک پھولوں اور کلیوں کی لڑی سہرے میں ہے
پیار کے گلشن کی ساری دل کشی سہرے میں ہے
ماں کی ممتا باپ کی شفقت بزرگوں کی دعا
اور بہنوں کی محبت تھی سجی سہرے میں ہے
سارے گورؤں کی ہے کرپا سارے سنتوں کی دعا
زندگی میں کار آمد راستی سہرے میں ہے
آج یکتا ہو گیا ہے پیار کا حسن و جمال
آج ثابت ہو گیا ہے زندگی سہرے میں ہے
اک نئی آواز لے کر آ گیا ہے مالکونس
اک نئے انداز میں شو رنجنی سہرے میں ہے
ہے زمیں کا چاند کیسا میں بھی دیکھوں تو ذرا
چاند کی ہر اک کرن بھی جھانکتی سہرے میں ہے
دوجے کو اپنا بنانا دل میں رکھنا عمر بھر
یہ کرشمہ اور یہ جادوگری سہرے میں ہے
زندگی بھر مل کے گائیں گے جسے یہ دونوں دل
پیار کی وہ میٹھی میٹھی راگنی سہرے میں ہے
سردار پنچھی
