شوق خوابیدہ وہ بیدار بھی کر دیتا ہے
ہوس زیست سے سرشار بھی کر دیتا ہے
حسن بے داغ کی بس ایک جھلک دکھلا کر
واقف لذت تکرار بھی کر دیتا ہے
پہلے وہ ڈالتا ہے آگ کے دریاؤں میں
پھر اسی آگ کو گلزار بھی کر دیتا ہے
رات بھر کرتا ہے وہ دن کے نکلنے کی دعا
صبح دم روشنی مسمار بھی کر دیتا ہے
قصۂ عفو و گزارش کے تسلسل کے لئے
بے خطاؤں کو خطا کار بھی کر دیتا ہے
خود ہی رکھتا ہے دیے تیز ہوا کی زد پر
اور آندھی سے خبردار بھی کر دیتا ہے
کبھی سکھلاتا ہے وہ صلح و صفائی کے ہنر
کبھی خود برسر پیکار بھی کر دیتا ہے
کبھی کرتا ہے نچھاور مری راہوں میں پھول
وقت مل جائے تو پر خار بھی کر دیتا ہے
انکساری کے سبھی راز بتا کر مجھ کو
یک بیک مائل پندار بھی کر دیتا ہے
پہلے کرتا ہے وہ آمادہ گناہوں پہ فریدؔ
پھر اس اک بات کا اظہار بھی کر دیتا ہے
فرید پربتی