علی

من موج میں ہے تن اوج پہ ہے
حق پاک سخی سلطان علیؐ
سرتاج سہاگ عقیدے کا
ہر مومن کا ایمان علیؐ
منبر، محراب، قدا، مسند
سب صوم، صلوات اذان علیؐ
ہر آیت کا مفہوم علیؐ
مقسوم علیؐ میزان علیؐ
بے عیب صحیفہ عصمت کا
لاریب کا در قرآن علیؐ
میرے قبلہ کی سج دھج زینت
تیرے کعبہ کا مہمان علیؐ
پاتال کی تہہ سے عرش تلک
میرے خالق کی پہچان علیؐ
سب نبیوں کا سردار کہے
میرا جسم علیؐ میری جان علیؐ
کونین کے تنہا خالق کا
مخلوق پہ ہے احسان علیؐ
ہر کفر کے راستے پہ حائل
فولاد کی ایک چٹان علیؐ
تقدیر کی شوخ انگوٹھی میں
جگ مگ جگ مگ ہر آن علیؐ
الماس علیؐ، یاقوت علیؐ
ہیرا گوہر، مرجان علیؐ

محسن نقوی