نئے نئے لفظ شور کرتے
بڑھے چلے آ رہے ہیں
فکر و خیال کی رہ گزار آباد ہو رہی ہے
زباں بہت سی پرانی حد بندیوں سے آزاد ہو رہی ہے
کئی فسانے جو ان کہے تھے کئی تصور جو بے زباں تھے
ہزار ہا سوز و ساز ایسے جو پہلے نا قابل بیاں تھے
وہ دھڑکنیں خامشی ہی جن کے خروش پنہاں کی ترجماں تھی
وہ نغمگی جو خموشیوں کے سیاہ زنداں میں پر فشاں تھی
اسے اب آخر کھلی فضاؤں میں اذن پرواز مل گیا ہے
کہ اک نیا رشتہ خیال و آواز مل گیا ہے
مگر مجھے چپ سی لگ گئی ہے
نئے نئے لفظ شور کرتے بڑھے چلے آ رہے ہیں
اور میں
ہجوم پر شور میں اکیلا
پرانے لفظوں کو ڈھونڈھتا ہوں
یہ دیکھتا ہوں
جہاں جہاں کل پرانے لفظوں نے ڈال رکھے تھے اپنے ڈیرے
وہاں نئے لفظ آ کے آباد ہو گئے ہیں
مکاں اگرچہ اجڑ نہ پائے مکین برباد ہو گئے ہیں
نئے نئے لفظ شور کرتے بڑھے چلے آ رہے ہیں
لیکن
پرانے لفظوں کی پائمالی نے دم بخود کر دیا ہے مجھ کو
کسی نے سوچا نہیں ہے شاید مگر میں اکثر یہ سوچتا ہوں
پرانے لفظوں کے ساتھ ہی اک پرانی دنیا بھی کھو گئی ہے
خموشیوں کے سیاہ زنداں میں جا کے روپوش ہو گئی ہے
مخمور سعیدی
