ملتے ہیں ہاتھ، ہاتھ لگیں گے انار کب جوبن کا ان کے دیکھیے ہوگا ابھار کب عشاق منتظر ہیں قیامت کب آئے گی بے پردہ منہ دکھائے گا وہ پردہ دار کب اک روز اپنی جان پہ ہم کھیل جائیں گے تم پوچھتے رہوگے یوں ہی بار بار کب کون آیا پڑھتے فاتحہ کس نے چڑھائے پھول مرنے کے بعد پوچھتا ہے کوئی یار کب بیکس کو کون روئے غریبوں کا کون ہے میری لحد پہ شمع ہوئی اشک بار کب جو اونچے اونچے ہیں وہی جاتے ہیں بام پر محفل میں ہم غریبوں کو ملتا ہے یار کب امید ناامید کو ان سے نہیں رہی دشمن کے دوست ہیں وہ ہوئے میرے یار کب ملنا چھڑایا تم سے مرا رشک غیر نے کرتا ہے کوئی آپ سے جبر اختیار کب جب نقد مال تو نے دیا ہم نے نقد دل ساقی ہمیں بتا دے کہ پی تھی ادھار کب آغاؔ کو ذبح کرتے ہو اپنی گلی میں کیوں جائز ہے میری جان حرم میں شکار کب
آغا اکبرآبادی
