منے کی پھلواری ہے یہ منے کی پھلواری ہے
رنگ برنگے پھول ہیں اس کے پتی پتی نیاری ہے
اس کے کونے میں اک گڑیا سندر روپ سجائے
پیارا البیلا اک گڈا کھیر جلیبی کھائے
ڈھول بانسری بین پپہری باجا بینڈ بجائے
پھولوں کے سب سجے براتی شادی کی تیاری ہے
یہ منے کی پھلواری ہے
تھالوں میں یہ بھانت بھانت کی رکھے ہوئے مٹھائی
رس گلوں کے ساتھ لگائے شیرہ اور ملائی
توند پہ اپنی ہاتھ پھیرتے ہیں چاچا حلوائی
دادی اماں روز کہیں یہ چاٹوں کا بیوپاری ہے
یہ منے کی پھلواری ہے
یہ دیکھو اک گھوڑا دوڑا وہ بھاگی اک موٹر
اس پر بیٹھا راج سپاہی اس پر بیٹھے مسٹر
یہ کھاتا دس کلو گھاس وہ ڈیزل دو دو لیٹر
چھک چھک پھک پھک شور مچاتی چلی ریل سرکاری ہے
یہ منے کی پھلواری ہے
ککڑوکوں وہ مرغا بولا بلی میاؤں میاؤں
کھوں کھوں کر کے اچھلے بندر کوا کاؤں کاؤں
بول غٹرغوں اڑا کبوتر کتا بھوں بھوں بھاؤوں
موچھیں تان کے غرایا وہ جنگل کا ادھیکاری ہے
یہ منے کی پھلواری ہے
یہ پیالوں میں دودھ بھرا ہے وہ انگور کی تھالی
آم سنتروں کے جھرمٹ میں یہ سیبوں کی لالی
کھری رس بھری کیلوں کی بو باس میں بنی نرالی
دیکھو پھلوں کے پاس لہکتی سبزی اور ترکاری ہے
یہ منے کی پھلواری ہے
بیکل اتساہی
