میری عنایتوں کے طلب گار آ گئے رحمت پکار اٹھی گنہ گار آ گئے اک لمحۂ سکون ملا مدتوں کے بعد اس کو بھی چھیننے مرے غم خوار آ گئے ہم نا سپاس لوگ کہاں جا کے اب رہیں بستی میں سارے شہر کے ہشیار آ گئے اک شخص کر رہا تھا غم عشق کا علاج حیرت سے دیکھنے اسے بیمار آ گئے بے منظری شکستہ دلی کھوکھلی ہنسی یہ شہر آرزو ہے تو بے کار آ گئے دو چار ہی قدم تو چلے چین سے شمیمؔ پھر اس کے بعد راستے دشوار آ گئے
شمیم فاروقی
![میری عنایتوں کے طلب گار آ گئے 1 IMG 20240311 005241](https://iztirab.com/wp-content/uploads/2024/03/IMG_20240311_005241.jpg)