میکدے تیرے تری مسجد صنم خانہ ترا یار ہر گھر ترا ہر گھر میں کاشانہ ترا یہ بھی اک اعجاز ہے اے پیر مے خانہ ترا بزم میں بے پاؤں کے چلتا ہے پیمانہ ترا ہم بلا نوشوں کی ہمت کو تو اے ساقی نہ پوچھ نشہ میں سر پر اٹھا لیتے ہیں مے خانہ ترا بے خبر ہونے پہ بھی ہے سارے عالم کی خبر زاہد ہشیار سے اچھا ہے مستانہ ترا یہ ملے قسمت ہے تو اس کے سوا کیا چاہیے تو ہو ساقی مے کدہ ہو اور مستانہ ترا ساقیا جاری رہے یوں ہی سبیل مے کشی تا ابد یوں ہی رہے آباد میخانہ ترا تجھ کو سودائے محبت مول لے کس کی مجال سنتے ہیں ہم جان و دل ہوتا ہے بیعانہ ترا ہم مسافر ہیں تو منہ تکتا ہے کیا پیر مغاں بس چلے تو دل میں رکھ لے جائیں مے خانہ ترا جس کو دیکھا تجھ پہ مرنے کے لیے تیار ہے میں ہی کیا اے شمع و عالم ہے پروانہ ترا پہلے بیدمؔ کی طرح کوئی گریبان چاک ہو شوق سے پھر جلوہ دیکھے بے حجابانہ ترا
بیدم شاہ وارثی
