یہ چینی کی گڑیا ہے یا ظالم بس کی پڑیا
یہ بد صورت گڈا ہے یا یورپ دیس کا بونا
ہم بھی ایک کھلونا یارو تم بھی ایک کھلونا
ٹینک کو دیکھو رینگ رہا ہے کیسا فٹ فٹ فٹ فٹ
اونٹ کو دیکھو دوڑ رہا ہے کیسا اونا پونا
ہم بھی ایک کھلونا یارو تم بھی ایک کھلونا
مرغا ککڑوں کوں کرتا ہے مرغی کٹ کٹ کٹ کٹ
چور بھگوڑا بھاگ رہا ہے لے کر ایک بھگونا
ہم بھی ایک کھلونا یارو تم بھی ایک کھلونا
چھنے بھیا سوچ رہے ہیں کیسے ہاتھ دکھائیں
منہ میں پانی ہاتھوں میں آلو کی چاٹ کا دونا
ہم بھی ایک کھلونا یارو تم بھی ایک کھلونا
گھونگھٹ اس کا چھ فٹ لمبا چوٹی دس فٹ لمبی
بیچ محلے آج ہوا کانی گڑیا کا گونا
ہم بھی ایک کھلونا یارو تم بھی ایک کھلونا
شبنم رومانی
