ہمارے ذوق پر یہ وقت اگر آیا تو کیا ہوگا نظر میں جذب ہو کر وہ نظر آیا تو کیا ہوگا غم ہستی کا تارا اوج پر آیا تو کیا ہوگا ہنسی میں بھی کوئی آنسو ابھر آیا تو کیا ہوگا ادھر تارے ادھر کلیاں ہیں مصروف گراں خوابی اگر ایسے میں پیغام سحر آیا تو کیا ہوگا یہ خالی جام رکھیں گے بھرم کب تک ترا ساقی جو میخانے میں کوئی دیدہ ور آیا تو کیا ہوگا تمہارا غم غم عالم کی سرخی بن تو سکتا ہے کوئی دھبہ اگر تاریخ پر آیا تو کیا ہوگا چلے تو ہیں تلاش آستاں میں اے شفاؔ ہم بھی مگر اپنا ہی پہلے سنگ در آیا تو کیا ہوگا
شفا گوالیاری
