در محبوب پر سجدہ اگر اک بار ہو جائے دل پر آرزو سر چشمۂ انوار ہو جائے تجلی عام ہو اور وا در اسرار ہو جائے جبین دل جو نقش آستان یار ہو جائے کمال ضبط کی خاطر گوارا ہی نہیں مجھ کو کہ حرف آرزو شرمندۂ اظہار ہو جائے مری کشتی ہے میں ہوں اور گرداب محبت ہے جو وہ ہو نا خدا میرا تو بیڑا پار ہو جائے زہے شان براہیمی کہ نمرودوں کی دنیا میں وہ جس آتش کو بھی کہہ دے وہی گلزار ہو جائے جو وہ چاہے تو مجھ کو اک نظر سے زندگی بخشے جو وہ چاہے تو بخت خفتہ بھی بیدار ہو جائے کرم اس کا ہے یہ یا معجزہ میرے تصور کا جہاں کر لوں میں بند آنکھیں وہیں دیدار ہو جائے ترے پینے کو روز آیا کرے گی عرش اعظم سے مئے عشق محمد سے جو تو سرشار ہو جائے
عرش ملسیانی
