کل گئے تھے تم جسے بیمار ہجراں چھوڑ کر چل بسا وُہ آج سب ہستی کا ساماں چھوڑ کر طفل اشک ایسا گرا دامان مژگاں چھوڑ کر پھر نہ اٹھا کوچۂ چاک گریباں چھوڑ کر کیونکہ نکلے ترا اِس کا دِل میں پیکاں چھوڑ کر جائے بیضے کو کہاں یہ مرغ پراں چھوڑ کر جس نے ہو لذت اٹھائی زخم تیغ عشق کی کب وُہ مرہم دان کو ڈھونڈے نمک داں چھوڑ کر صید دِل کو کیونکہ چھوڑے جب کے دکھلا دے نہ تو مچھلیاں دست حنائی میں میری جاں چھوڑ کر سرد مہری سے کسی کی آگے ہی جی سرد ہے یاں سے ہٹ جا دھوپ اے ابر خراماں چھوڑ کر دیکھیے کیا ہو کے ہے اب جان کہ پیچھے پڑی دِل کو اے کافر تیری زلف پریشاں چھوڑ کر اے دِل اِس کہ تیر کہ ہم راہ سینے سے نکل ورنہ پچھتائے گا تو یہ ساتھ ناداں چھوڑ کر کیوں نہ رم کر جائیں آہو ایسے وحشی سے تیرے شیر بھاگیں جس کہ نالوں سے نیستاں چھوڑ کر سرخی پاں دیکھ لے زاہد جو دنداں پر تیرے اٹھ کھڑا ہو ہاتھ سے تسبیح مرجاں چھوڑ کر پیش خیمہ لے کے نکلا گرد باد دور رو ہے جُو سرگرم سفر تن کو میری جاں چھوڑ کر گر خدا دیوے قناعت ماہ دوہفتہ کی طرح دوڑے ساری کو کبھی آدھی نہ انساں چھوڑ کر ساغر دِل بیچتا آیا ہوں کھو مت ہاتھ سے چوکتا ہے کیوں یہ جنس دست گرداں چھوڑ کر کام یہ ترا ہی تھا رحمت ہو اے ابر کرم ورنہ جائے داغ عصیاں مرا داماں چھوڑ کر پڑھ غزَل اے ذوقؔ کوئی گرم سی اب تُو نہ جا .جانب مضمون طرز تفتہ جاناں چھوڑ کر
شیخ محمد ابراہیم ذوقؔ
